Make your own free website on Tripod.com
2° metá de  Xuliu 2005
Primeira edición
Vuelta a anicial        

Programas
Arquivos sonoros
Collabora
País Llionés
España y Pertual
Outros países
Desportes
Collabora
Las Arribes
El Bierzu
Zamora
L'espertu opina
La súa opinión
Prensa llionesa
Radiu llionesa
Televisión llionesa
Turismu llionés

 

 

 
 
 
Insegurancia nel Reinu Xuníu tres los atentaos

 

El númberu oficial de las vítimas nos atentaos islamistas del día siete ye de 53. Los feríos pasan de 700. A las nueve de la mañana d'esi día, deillas esplosiones tuvieran llugar nel centru de Londres, en tres paradas del metru y una llínia de bus turísticu. Nun entamu las autoridaes británicas falonun d'un cientu feríos y d'un númberu inciertu de muertos. Poucu dempués de las esplosiones, Scotland Yard reconocíu un propósitu terrorista nas esplosiones y falóu d'un plan conxuntu. Llueu, Al Qaeda fízose responsable del autu terrorista.

 

Pola tarde el primer ministru Tony Blair, fondamente atristayáu, intervieno na televisión pa declarare que los atentaos nun diban camudare los valores de la sociedá civil inglesa.

 

El terrorismu islámicu golpioú'l carrastriellu del centru económicu londinense ya européu allanciando la vida bursátil y llaboral de millares de presonas y desatando un grande sentimientu d'insegurancia ente los sous habitantes. Na nueite del sábadu la policía tuvu d'ordinare la evacuación del centru de Birmingham por una amenaza de bomba, y el llunes escubrióuse un paquete ensin dueñu que llevóu a las autoridaes de proteición civil a pechar el centru de Londres por deillas horas.

 

Los espertos inda tan a identificare los restos de las vítimas. Dalgunas fuenon yá identificadas, las familias d'outras deberán aguardare máis.

 

Los terroristas islámicos que fixenun los atentaos, tres paquistanís (de nome  Mohammed Sidique Khan, Hasib Hussain, y Shehzad Tanweerya) ya un xamaicanu (Lindsey Germail) preparanun las súas aiciones mortales na ciudá inglesa de Leeds. Yeran toos presonas normales, "de la cai", magar que deillos vicinos califícanlas de "estremadamente relixosas". Una deillas mesmu taba casada con una inglesa y tenía fíos.

Sigún las autoridaes británicas ye posible que nun tuvieran l'envís de suicidase, puéis la policía atopóu nos sous restos billetes de tres de vuelta a casa y tickets d'estacionamientu.

Inda nun ta craru cómu fixenun los esplosivos y cualas yeran las súas intenciones orixinales.

 

Los cuartos en Rumanía camudan de nome

 

Dende'l primeiru de xuliu la moneda rumana, el leu (tornáu al llionés "llión") ou lei, tien outru valor. El nuevu leu val 10.000 lei vieyos. Ye una medía máis tomada pol gobiernu rumanu pa algamare la entrada en xaneiru y ún de 2007 na Xunión Europea xunta a Bulgaria.

 

Ante tóu la situación económica ye'l prencipal problema nel camín rumanu ta la integración n'Europa. Magar las muitas inversiones foriatas qu'hebo nos cabeiros años nel país allugáu ente los Cárpatos y la Mar Prieta, el nivel de vida nun meyoróu tan apriesa comu n'outros países del exbloque comunista ya esi apostalgamientu nas reformas provocóu que muita xente nueva marchara al restu d'Europa a la gueta de trabayu y meyores condiciones de vida. Cola medía alcordada pol gobiernu rumanu  piénsase en ponere fin a las ondas d'emigración masiva d'entamu la década. 

 

 




 



 

 





 

 

Fueya Llionesa
Fueya d'información en llingua llionesa

Llión, Zamora, Salamanca, Miranda l Douro, Valdiorras, El Carrión
fueyallionesa@hotmail.com